Bakı, 21 oktyabr, Sporaz.tv
Muhammad Ali, həm boksda, həm də sosial mövqeyi ilə dünyada iz qoymuşdur. O, əfsanəvi boksçu və insan hüquqları müdafiəçisi kimi tanınır.
Sporaz.tv xəbər verir ki, 17 yanvar 1942-ci ildə Kentukki ştatında Cassius Clay adı ilə doğulan Ali, 12 yaşında boksla maraqlanmağa başlayıb.
1960-cı ildə Romadakı Olimpiya Oyunlarında qızıl medal qazandı. 1964-cü ildə Sonny Listonu məğlub edərək dünya ağır çəkili çempionu oldu. Bu qələbə Ali’nin idman tarixində dönüş nöqtəsi idi.
Ali, 1964-cü ildə İslam dinini qəbul edərək adını Muhammad Ali olaraq dəyişdirdi. Bu, onun öz şəxsiyyətini və inancını ön plana çıxaran mühüm bir qərar idi. Bu addım onu daha da qabarıq şəkildə siyasi və mədəni liderə çevirdi.
1967-ci ildə Vyetnam müharibəsinə çağırışı rədd edən Ali, dini və mənəvi inanclarına əsaslanaraq müharibədə döyüşməyi rədd etdi. Bu mövqeyi səbəbindən Ali-nin boks lisenziyası əlindən alındı və o, rinqdən uzaqlaşdırıldı. Lakin Ali, irqi ədalət və sülh uğrunda mübarizəni davam etdirdi və nəticədə onun bu qərarı ABŞ Ali Məhkəməsi tərəfindən müdafiə edildi.
1971-ci ildə Ali rinqə qayıtdı və Joe Frazier, George Foreman kimi rəqiblərlə tarixi döyüşlər keçirdi. Üç dəfə dünya ağır çəkili çempionu olan Ali, boks tarixinə əbədi damğasını vurdu. 1984-cü ildə Parkinson xəstəliyinə tutulsa da, Ali, humanitar işlərdə fəal şəkildə iştirak etməyə davam etdi.
Muhammad Ali’nin karyerasında bir çox əfsanəvi döyüşlər olub, lakin ən vacibi 1974-cü ildə George Foreman ilə keçirdiyi “The Rumble in the Jungle” döyüşü sayılır. Bu döyüş Ali’nin geri dönüşünü simvolizə edirdi və onun boks karyerasında əsl zirvə nöqtəsi oldu.
“The Rumble in the Jungle” (Ali vs. Foreman)
- Tarix: 30 oktyabr 1974
- Yer: Kinşasa, Zair (indiki Konqo Demokratik Respublikası)
- Rəqib: George Foreman
Bu döyüş zamanı George Foreman dünya ağır çəkili çempionu idi və o vaxta qədər rəqiblərini tez-tez nakauta göndərən güclü zərbələri ilə məşhur idi. Ali isə bir neçə il əvvəl Vyetnam müharibəsinə qarşı mövqeyi səbəbindən lisenziyasını itirdikdən sonra rinqə qayıtmışdı və Foreman ilə döyüş onun üçün böyük bir sınaq idi.
Döyüşdə Ali məşhur “Rope-a-dope” taktikasını tətbiq etdi. Bu taktika ilə o, Foreman’ın güclü zərbələrindən qaçaraq, onu yorulmağa məcbur etdi. Ali, döyüşün ilk raundlarında zərbələri udmağa çalışdı və ipdən dəstək alaraq müdafiəyə keçdi. Döyüşün səkkizinci raundunda Ali Foremanı gözlənilməz bir zərbə ilə nokauta saldı və yenidən dünya çempionu oldu.
Bu qələbə, Ali’nin əzmkarlığını və taktiki zəkasını nümayiş etdirdi və onu bir daha əfsanəyə çevirdi. “The Rumble in the Jungle” yalnız boks tarixində deyil, ümumiyyətlə idman tarixində ən vacib döyüşlərdən biri hesab olunur.
Muhammad Ali, sadəcə idmançı deyil, ədalət, cəsarət və bərabərlik simvolu olaraq tarixdə yerini aldı.
Məhəmməd Qasımov
