Bakı, 15 may, Sporaz.tv
Azərbaycan çempionatında mövsümün rekordu qeydə alınıb.
Yerli mediya Peşəkar Futbol Liqasının rəsmi saytına istinadən xəbər verir ki, “Füzuli”–in futbolçusu Elvin Nəsibov bir oyunda 7 qol vurub. O, II Liqanın XXV turunda fərqlənib.
Hücumçunun qolları “Kürmük Qax”la ev matçında komandasına 7:2 hesablı qələbə qazandırıb. Bu, mövsümün rekordu olsa da, ölkə çempionatları tarixində ilk belə hal deyil. Digər turnirləri nəzərə almasaq, təkcə Premyer Liqada iki futbolçu 7 qol vurmağı bacarıb. Hər iki oyunçu buna “Kəpəz” forması ilə nail olub. Fazil Pərvərov 1993-1994-cü illər mövsümündə “Avtomobilçi” ilə görüşdə (8:0) yeddi dəfə fərqlənib. Üç il sonra – 1996-1997-ci illər mövsümündə Rövşən Əhmədov “Şəmkir” üzərində 14:2 hesablı qələbədə qolların yarısını vurub.
Mənbə:AZƏRTAC
