Bakı, 22 oktyabr, Sporaz.tv
MLS-in yeni tətbiqi “Player Spotlight” ilə “İnter Miami“-nin MLS CUP 2024-də oynayacağı matçda Lionel Messinin sinəsinə kamera yerləşdiriləcək. Argentinalı ulduzun nöqteyi-nəzərindən matçın bütün anları Tiktok platformasında hər an şifrəsiz yayımlanacaq. Cümə gecəsi “İnter Miami”-nin oynayacağı matçda futbolsevərlər ilk dəfə matçı yalnız Messinin kamerasından izləyə biləcəklər.
Sporaz.tv məlumat verir ki, MLS bütün futbolsevərləri, xüsusən də Messi azarkeşlərini həyəcanlandıran tətbiqi həyata keçirir. Lionel Messinin sinəsinə taxılan kamera ilə bütün matç argentinalı ulduzun baxış bucağından anbaan yayımlanacaq.
MLS-dən verilən açıqlamaya görə, tətbiq “İnter Miami”-nin cümə gecəsi oynayacağı matçla həyata keçiriləcək. “Player Spotlight” adlanan yayım Tiktok platformasında futbol azarkeşləri ilə görüşəcək.
Futbolsevərlər, bu yayımı Messinin gözündən, sanki onunla meydandaymış kimi izləyə biləcəklər.
MLS rəhbərliyi 2023-cü ildə ABŞ Açıq Kuboku matçında yalnız Lionel Messini izləyən kameradan istifadə edib.
Lionel Messi, “İnter Miami”-də 36 oyun keçirib. 37 yaşlı futbolçu bu matçlarda 33 qol vurub, 17 məhsuldar ötürmə edib.
