Bakı, 9 oktyabr, Sporaz.tv
“Wimbledon“-da yeni mövsüm üçün geri sayım başladı. Gələn ilki çempionatdan etibarən ot meydançalarının yan və arxa hissəsindəki xətt hakimləri elektron sistemlə əvəz olunacaq.
Sporaz.tv məlumat verir ki, “Wimbledon”-da yeni dövr başlayır. 147 illik köklü tarixi olan “Böyük Dəbilqə” yarışlarında otlu kortların yan və arxa tərəfindəki xətt hakimləri keçmişə çevrilib.
Gələn ildən etibarən “Wimbledon”-da xətt hakimləri elektron sistemlə əvəz olunacaq.
Top yerə toxunduqdan sonra saniyənin 1/10-u ərzində reaksiya verən yeni sistem 100 mil/saat sürətlə gələn xidmətlər üçün xətt hakimlərindən daha dəqiq olaraq qiymətləndirilir.
All England Lawn baş meneceri Sally Bolton, test nəticələrinə görə texnologiyanın kifayət qədər möhkəm olduğunu və maksimum dəqiqlik üçün elektron hakim sisteminə güvəndiklərini söylədi.
Bolton həmçinin deyib: “Biz Wimbledonda ənənə və innovasiya arasında tarazlıq yaratmaq məsuliyyətimizə çox ciddi yanaşırıq. Hakimlər onilliklər ərzində burada böyük rol oynayıblar. Biz onlara dəyərli töhfələrinə, öhdəliklərinə və xidmətlərinə görə təşəkkür edirik.”
