Bakı, 2 oktyabr, Sporaz.tv
Marc-Andre ter Stegenin zədəsindən sonra “Barcelona” yeni qapıçısını açıqlamağa hazırlaşır. Kataloniya komandasının heyətinə qatmağa hazırlaşdığı Wojciech Szczesny “Young Boys” matçını tribunadan izləyib.
Sporaz.tv xəbər verir ki, UEFA Çempionlar Liqasının liqa mərhələsinin 2-ci həftə matçında “Barselona” “Young Boys”un maneəsini fərqlənərək keçib.
Hansi Flickin komandası “Young Boys”u 5:0 hesabı ilə məğlub edərək, Çempionlar Liqasında bu mövsüm ilk qələbəsini qazanıb. “Barselona”nın qollarını Robert Lewandowski (2), Raphinha, Inigo Martinez və Ali Camara (avtoqol) vurub.
“Barselona”nın kapitanı Marc-Andre ter Stegen La Liqada “Villarreal”la matçda zədələnərək mövsümü başa vurub. Təcrübəli əlcəkinin uzun müddətli zədəsindən sonra qapıçı axtarışına başlayan “Barcelona”, son aylarda təqaüdə çıxdığını açıqlayan Wojciech Szczesny ilə danışıqları böyük ölçüdə tamamladı.
Təqaüd qərarından geri addım atmağa hazırlaşan Wojciech Szczesny dünən “Barselona”nın “Young Boys” matçını tribunadan izləyib.
“Barcelona”nın yaxın vaxtlarda transferini açıqlaması gözlənilir. LaLiga qaydalarına görə, komandalar belə uzunmüddətli zədələrdə boş qalan oyunçularla müqavilə bağlaya bilər.
Wojciech Szczesny avqustun 27-də futbolçu karyerasını bitirdiyini açıqladı. Szczesnynin təqaüdə qərarından əvvəl “Juventus” təcrübəli qapıçı ilə müqaviləni ləğv edib.
Wojciech Szczesny karyerası ərzində 548 matçda iştirak edib. Szczesny, bu matçlarda 559 qol buraxdığı halda, 210 matçda qapısını təmiz saxlayıb. Təcrübəli qapıçı karyerasında “Agrykola Warszawa”, “Arsenal”, “Brentford”, “Roma” və “Juventus”da çıxış edib.
Bahar Rüstəm
